عتاب............................................

عيونك عواصف
دموعك مقاصل
و زَعَلـِكْ هـلاكْ.

بسيمتـِـك نجيمة
و رذاذ ألفِ غيمة
بتلوح في سماكْ

مكتـّـف قُصادِك
قليبي ، وبـُعادِك
يولّعْ هَوَاك

لقيتِك حزينة
و دموعِك ثخينة
بْتـَبلّلْ نَدَاك

رياح هاجـَمَتـْني
و كَدَرْ هدّ متـْني
و سعادتي فْ رضاك

سألتِك : علامِك؟
و مين جنّ لامِك؟
و عكـّرْ صَفاك؟

و كيف المغارِبْ
و ضوّ المسارِبْ
يشابه خطاك؟

رميتي السعادة
و خلاف أيّ عادة:
اشتكيتي الهواكْ

جعَلْتِني سِبّة
و هواي ليك مَسَبّة
و أنا الفي رجاك:

بنيتْ ألفِ غاية
و حمَلْتِكْ معايا
و عشقـْتـِك براك

كتبتَ الرسايل
و دَمْ قلبي سايل
مدفّق فداك

متين دُرتو زَعَلِك؟
و كيف حبي جَعَلِك
تسوّي الشّرَاك؟

تصيدي المتيّم
سماهو اللي غيّم
يغازل سماك

تبيعي الأمانة
و تفضـّي المكانة
اللي عاشَتْ جواك

يضلّم نَهَارِك
وتنسيهو جارِك
مجندَل وراك

بقولّك نصيحة
وبرسّلْ رسالة
و بجادل معاك:

إذا إنتي غالية
و محصّن قليبك
بعيد في عُلاك

بتلقيني عـِـزّة
وشموس مستفزة
و بسيبك براك