شخابيط عفوية على شكل رباعيات .. الجزء التانى

زرعوا الشراقى بالمحبة ..... حَـبْ
طرحت محبة فى قلب عمره ما حَبْ
وأنا اللى كروان يطرب العاشقيـــــن
قلبى المتيــم عمره يوم ما أتحَـــــبْ

***

يا بحر أمرك عجب شايل كتير أســـرار
رغم إن قلبك دهب .. قالوا عليه غـدار
ولا مرة يوم ملّيت ولا قولت حملك زاد
مع إن لو سبتنا .. نبكي عليك بمــرار

***

يا طرف شال فرحها ... رفرف على قلبــــى
وشوشنى بوح سرها دانا فكري بيه طال بي
بتحبنى ولا .. مشغولة مع غيـــــــــــرى ؟؟؟
مايلة لي أنا ولا ... الوهم ده مـــال بي ؟؟؟

***

أنقشنى حنة فى كفها .. وأرسمنى بيه قلبيــن
وأسقينى من ريق شفها قبل الوداع والبيـــــن
ده العمر أهو فى أوله ... لكنه برضه قليــــل
وسنينا لو طولــوا ... ما يكفوناش حبيبيـــن

***

دنيا عجيبة يا بحر قلبك غريب فيهــا
الكل داق مُرها ... وبيبكي مُضنيهــا
الكل جاي قاصد يدواي بهواك علّتـــه
وعلّتك يا بحر مين يقدر يداويها ؟؟؟